Jólatónleikar Sinfóníunnar um helgina
Barbara trúður og Bernharður Wilkinson stjórna fernum tónleikum í Eldborg
Jólatónleikar Sinfóníunnar hafa fest sig í sessi í aðdraganda jóla hjá mörgum fjölskyldum á Íslandi. Á tónleikunum er hátíðleikinn í fyrirrúmi og þar eiga sígildar jólaperlur fastan sess. Í ár er lögð sérstök áhersla á jólatónlist frá öllum Norðurlöndunum og hljómar nýr forleikur með norrænum jólalögum í útsetningu Hrafnkels Orra Egilssonar.
Hátt í 300 tónlistarmenn og -nemar stíga á svið á Jólatónleikum Sinfóníunnar í ár. Auk Sinfóníuhljómsveitar Íslands undir stjórn Bernharðs Wilkinson koma fram nemendur Listdansskóla Íslands, kóra Langholtskirkju, Skólahljómsveit Kópavogs, Bjöllukór Tónlistarskóla Reykjanesbæjar og táknmálskór.
Einsöngvarar á tónleikunum eru Eivør Pálsdóttir, Hallveig Rúnarsdóttir og Kolbrún Völkudóttir. Trúðurinn Barbara kynnir tónleikana af sinni alkunnu snilld en tónleikarnir eru einnig túlkaðir á táknmáli.
Þess má svo geta að nemendur úr Skólahljómsveit Kópavogs og Bjöllukór Tónlistarskóla Reykjanesbæjar flytja jólalög í Hörpuhorni fyrir og á eftir tónleikum.
- Eldri frétt
- Næsta frétt