Komin heim eftir glæsilega tónleikaferð til Bretlands
Sinfóníuhljómsveit Íslands er komin heim eftir velhpennaða tónleikaferð um Bretland undir stjórn hljómsveitarstjórans Yan Pascal Tortelier. Hljómsveitin hélt átta tónleika í mörgum af helstu tónleikahúsum Bretlands og lauk með tónleikum í hinu glæsilega tónleikahúsi Usher Hall í Edinborg. Hljómsveitin fékk frábærar móttökur í Bretlandi og fengu tónleikarnir í Edinborg m.a. fimm stjörnur í The Herald og fjórar stjörnur í The Scotsman.
Lokatónleikar Bretlandsferðarinnar voru í glæsilega tónlistarhúsi Usher Hall í Edinborg.
Ferðin var farin á 70 ára afmælisári Sinfóníuhljómsveitar Íslands en hún hélt sína fyrstu tónleika 9. mars 1950. Afmælinu verður fagnað á stórtónleikum í Eldborg 5. mars næstkomandi undir stjórn Evu Ollikainen, verðandi aðalhljómsveitarstjóra Sinfóníunnar.
Hljómsveitin hélt tónleika í mörgum af helstu tónleikarsölum Bretlands,
meðal annars í Town Hall í Leeds.
Yan Pascal Tortelier, fyrrum aðalhljómsveitarstjóri Sinfóníuhljómsveitar Íslands stjórnaði hljómsveitinni og Anna Þorvaldsdóttir, staðartónskáld hljómsveitarinnar var með í för en verk hennar Aeriality var flutt á öllum tónleikum ferðarinnar. Þá komu til liðs við hljómsveitina tveir heimskunnir píanóleikarar þau Jean-Efflam Bavouzet og Yeol Eum Son sem skiptust á að flytja píanókonsert Ravels. Einnig lék hljómsveitin L'Arlesienne svítuna eftir Bizet og sinfóníu nr. 1 eftir Sibelius.
Anna Þorvaldsdóttir staðartónskáld var með í ferð en verk hennar Aeriality
var flutt á öllum tónleikum hljómsveitarinnar í Bretlandi.
Hljómsveitin hefur hlotið mikið lof á tónleikaferðalaginu og gaf gagnrýnandi Reviews Gate tónleikunum í Nottingham fimm stjörnur og sagði: „Blóðheit spilamennska ásamt stefnufastri túlkun skildi áheyrendur eftir þyrsta í að heyra meira.“
Þetta var fyrsta tónleikaferð hljómsveitarinnar til Bretlands en áður hefur hún haldið eina tónleika í London á Proms-tónlistarhátíð BBC árið 2014.
- Eldri frétt
- Næsta frétt