Sinfóníuhljómsveitin í 5 ár í Hörpu
Þann 4. maí eru liðin 5 ár frá því Sinfóníuhljómsveit Íslands hélt opnunartónleika í Hörpu undir stjórn Vladimirs Ashkenazy heiðursstjórnanda hljómsveitarinnar. Tónleikarnir voru söguleg stund í íslensku tónlistarlífi enda höfðu margir beðið eftir nýju tónlistarhúsi svo áratugum skipti.
Hljómsveitin flutti glæsilega og fjölbreytta efnisskrá á opnunartónleikunum þar sem leikið var nýtt verk eftir Þorkel Sigurbjörnsson sem samið var fyrir tilefnið; Víkingur Heiðar Ólafsson lék einleik í píanókonsert Edvards Grieg og að lokum flutti hljómsveitin 9. sinfóníu Beethovens. Einsöngvarar voru Christiane Oelze, Sesselja Kristjánsdóttir, Kolbeinn Jón Ketilsson og Bjarni Thor Kristinsson en að auki tók Óperukórinn í Reykjavík ásamt Kór Áskirkju og Hljómeyki þátt í þessum viðamikla flutningi.
Tónleikarnir sýndir á RÚV
Tónleikarnir voru endurteknir 5. og 6. maí í Hörpu og teknir upp og sendir út í Sjónvarpinu. Í tilefni af tímamótunum mun RÚV endursýna upptökuna frá opnunartónleikunum síðdegis á uppstigningardag.
Sinfóníuhljómsveit Íslands útbjó lítið myndband frá fyrstu dögum hennar í Hörpu sem nú hefur verið birt á YouTube-rás hennar og er aðgengilegt hér að neðan.
- Eldri frétt
- Næsta frétt