Klassíkin okkar – hvert er þitt uppáhald?
Sinfónían og RÚV leita að uppáhaldsverkum þjóðarinnar
Hvert er uppáhalds tónverkið þitt? Er það Bolero eftir Ravel eða Árstíðirnar fjórar eftir Vivaldi? Er það píanókonsert eftir Mozart eða sinfónía eftir Beethoven? Þann 2. september næstkomandi efnir Sinfóníuhljómsveit Íslands til hátíðartónleika þar sem þjóðin ræður efnisskránni. Tónleikarnir verða í beinni sjónvarpsútsendingu á RÚV og liður í 50 ára afmælishátíð Sjónvarpsins, sem hóf göngu sína í september 1966.
Kjóstu þitt eftirlætisverk–kosningin hefst 24. maí
RÚV og Sinfóníuhljómsveit Íslands setja því af stað netkosningu 24. maí á slóðinni ruv.is/klassikin þar sem allir landsmenn geta valið eftirlætis tónverkið sitt. Þau verk sem flest atkvæði hljóta í kosningunni fá sinn sess í efnisskrá tónleikanna í haust, sem verða um leið upptaktur að glæsilegu starfsári Sinfóníuhljómsveitarinnar. Hljómsveitarstjóri er Daníel Bjarnason, en Víkingur Heiðar Ólafsson og Sigrún Eðvaldsdóttir verða einnig til taks ef á þarf að halda. Ekkert er þó hægt að fullyrða um úrslitin enn, því efnisskráin er í höndum almennings.
Ekki viss? Ekkert mál!
Á meðan netkosningunni stendur verður Rás 1 til taks fyrir þá sem eru að gera upp hug sinn. Fjörutíu vinsæl verk og kaflar frá ýmsum tímum verða kynnt í útvarpsþáttum í umsjón Guðna Tómassonar, sem hefja göngu sína laugardaginn 21. maí.
Sinfóníuhljómsveitin hefur líka sett saman lagalista á Spotify-rás sinni með tóndæmum úr öllum verkunum.
Verk og kaflar sem kosið er um:
| Bach: Air úr hljómsveitarsvítu nr. 3 |
| Bach: Badinerie úr hljómsveitarsvítu nr. 2 |
| Barber: Adagio fyrir strengi |
| Beethoven: 9. sinfónía, Óðurinn til gleðinnar |
| Beethoven: Píanókonsert nr. 5, 3. þáttur |
| Beethoven: Sinfónía nr. 5, 1. þáttur |
| Beethoven: Sinfónía nr. 7, 2. þáttur |
| Bernstein: Mambó úr West Side Story |
| Bizet: Carmen, forleikur |
|
Brahms: Ungverskur dans nr. 5 |
| Dvorák: Sinfónía nr. 9, 2. þáttur |
| Elgar: Nimrod úr Enigma-tilbrigðunum |
| Grieg: Í höll dofrakonungs, úr Pétri Gaut |
| Händel: Alla hornpipe, úr Lagartónlist |
| Händel: Halelúja-kórinn, úr Messíasi |
| Holst: Mars, úr Plánetunum |
| Johann Strauss yngri: An der schönen blauen Donau (Dóná svo blá) |
| Katsjatúrían: Sverðdansinn |
| Liszt: Ungversk rapsódía nr. 2 |
| Mahler: Sinfónía nr. 5, Adagietto |
| Mascagni: Intermezzo úr Cavalleria rusticana |
| Mozart: Brúðkaup Fígarós, forleikur |
| Mozart: Píanókonsert í C-dúr, 467, 2. þáttur |
| Mozart: Sinfónía nr. 40 í g-moll, 1. þáttur |
| Orff: Carmina burana, 1. þáttur |
| Prokofiev: Montag og Kapúlett, úr Rómeó og Júlíu |
| Rachmaninov: Píanókonsert nr. 2, 2. þáttur |
| Ravel: Bolero |
| Rimskíj-Korsakov: Býflugan |
| Rossini: Vilhjálmur Tell, forleikur |
| Schubert: Ófullgerða sinfónían, 1. þáttur |
| Shostakovitsj: Píanókonsert nr. 2, 2. þáttur |
| Sibelius: Fiðlukonsert, 1. þáttur |
| Smetana: Moldau |
| Stravinskíj: Vítisdans úr Eldfuglinum |
| Tsjajkovskíj: Dans sykurplómudísarinnar, úr Hnotubrjótnum |
| Tsjajkovskíj: Píanókonsert nr. 1, 1. þáttur |
| Vivaldi: Vorið, 1. þáttur |
| Wagner: Valkyrjureiðin, úr Niflungahringnum |
- Eldri frétt
- Næsta frétt