19. febrúar 2020

Sinfónían tilnefnd til Íslensku tónlistarverðlaunanna 2019

Sinfóníuhljómsveit Íslands hlut þrjár tilnefningar til Íslensku tónlistarverðlaunanna 2019, sem flytjandi ársins, fyrir plötu ársins og tónlistarviðburð ársins. Verðlaunaafhendingin verður haldin í Hörpu miðvikudaginn 11. mars í beinni útsendingu á RÚV.

Sinfóníuhljómsveit Íslands er tilnefnd sem flytjandi ársins fyrir hljóðritanir og útgáfur á árinu ásamt tónleikum og tónleikaferð hljómsveitarinnar til Þýskalands og Austurríkis með Daníel Bjarnasyni, aðalgestastjórnanda Sinfóníunnar, og Víkingi Heiðari Ólafssyni.

Concurrence er tilnefnd sem plata ársins í sígildri- og samtímatónlist en platan er gefin út af bandaríska útgáfufyrirtækinu Sono Luminus. Á disknum má heyra verk eftir Önnu Þorvaldsdóttur, Hauk Tómasson, Maríu Huld Markan Sigfúsdóttur og Pál Ragnar Pálsson. Hljómsveitarstjóri í upptökunum var Daníel Bjarnason. Þá er Daniel Shores einnig tilnefndur sem upptökustjóri ársins fyrir plötuna. 

Tónleikar hljómsveitarinnar á Myrkum músíkdögum undir stjórn Daníels Bjarnasonar eru tilnefndir sem viðburður ársins í sígildri- og samtímatónlist en á tónleikunum frumflutti hljómsveitin m.a. Crevace, konsert fyrir flautu og fagott eftir Pál Ragnar Pálsson sem er tilnefnt sem tónverk ársins ásamt Lendh eftir Veronique Vöku sem einnig var frumflutt á tónleikunum.

Einnig er gaman að sjá fleiri tilnefningar sem tengjast hljómsveitinni. Anna Þorvaldsdóttir, staðartónskáld Sinfóníunnar, er tilnefnd fyrir kammerverkið Enigma sem var frumflutt af Spektral Quartet í Kennedy Center í Bandaríkjunum. Í flokki flytjenda ársins eru margir listamenn sem hafa komið fram með hljómsveitinni á árinu. Það eru Sæunn Þorsteinsdóttir sellóleikari og Víkingur Heiðar Ólafsson píanóleikari sem bæði léku einleik með hljómsveitinni á tónleikum og í upptökum á árinu, Bjarni Frímann Bjarnason sem gegnir stöðu aðstoðarhljómsveitarstjóra Sinfóníunnar, Laufey Jensdóttir, fiðluleikari í hljómsveitinni og Sigurgeir Agnarson, leiðandi sellóleikari hennar.