2019 (Síða 4)

Í tilefni af Maraþontónleikum Sinfóníuhljómsveitar Íslands á Menningarnótt tóku hljóðfæraleikarar og starfsmenn hljómsveitarinnar sig saman og fjölmenntu í Reykjavíkurmaraþonið fyrr um daginn. Samtals tóku um 30 starfsmenn þátt og hlupu samtals 350 km og söfnuðu 249.000 kr. til styrktar Hugarafli.

„Ég er full tilhlökkunar og eftirvæntingar fyrir komandi starfsári Sinfóníuhljómsveitar Íslands, sem jafnframt verður mitt fyrsta ár í starfi,“ segir Lára Sóley Jóhannsdóttir framkvæmdastjóri Sinfóníuhljómsveitar Íslands í ávarpi sínu fyrir nýtt starfsár hljómsveitarinnar. „Ég er stolt af því að tilheyra samfélagi sem hefur hlúð jafn vel að þjóðarhljómsveit sinni og Íslendingar hafa gert í hartnær 70 ár.“

Nýr geisladiskur Sinfóníuhljómsveitar Íslands með tveimur sinfóníum franska tónskáldsins Charles Gounod hefur fengið frábæra dóma í helstu tónlistartímaritum klassíska geirans. Í BBC Music Magazine fær diskurinn fimm stjörnur bæði fyrir flutning og hljóðritun og í júní tölublaði Gramophone er diskurinn valinn einn af tíu bestu útgáfum mánaðarins.

Á Menningarnótt í Reykjavík 2019 býður Sinfóníuhljómsveit Íslands á tvenna tónleika. Á fjölskyldutónleikunum kl. 15 verður boðið upp á tónlistarævintýri um Maxímús Músíkús. Á seinni tónleikunum kl. 17 verður leikin fjörmikil og hressileg tónlist til heiðurs þeim sem lokið hafa hlaupi í Reykjavíkurmaraþoninu. Aðgangur að tónleikunum er ókeypis og eru allir velkomnir. Hægt er að nálgast miða frá kl. 11 á tónleikadegi í miðasölu Hörpu og hér á vef hljómsveitarinnar.

Finnski hljómsveitarstjórinn Eva Ollikainen hefur verið ráðin í stöðu aðalhljómsveitarstjóra og listræns stjórnanda Sinfóníuhljómsveitar Íslands og tekur við stöðunni í byrjun starfsársins 2020/21. Ollikainen er ráðin til fjögurra ára og mun stjórna hljómsveitinni að jafnaði í átta vikur á hverju starfsári. Auk þess mun hún stýra hljómsveitinni á fyrirhuguðum tónleikaferðum innanlands sem utan.

Eddu II: Líf guðanna eftir Jón Leifs er kominn út hjá úgáfufyrirtækinu BIS. Hljóðritunin fór fram í Hörpu í apríl 2018 í kjölfarið af frumflutningi verksins 23. mars í Eldborg. Einsöngvarar í verkinu eru Hanna Dóra Sturludóttir, Elmar Gilbertsson og Kristinn Sigmundsson ásamt Schola cantorum undir stjórn Harðar Áskelssonar. Hljómsveitarstjóri er Hermanns Bäumer.

Diskurinn er væntanlegur í verslanir í næstu viku og verður til sölu í Smekkleysu á Skólavörðustíg og Epal í Hörpu.

Út er kominn nýr safndiskur með leik Rutar Ingólfsdóttur og Sinfóníuhljómsveitar Íslands frá árunum 1971–1986, þar sem hún leikur sjö öndvegisverk fyrir fiðlu og hljómsveit eftir Mozart, Bartók, Hindemith o.fl. Í öllum tilvikum var um að ræða frumflutning verkanna á Íslandi.

Diskurinn fæst í Smekkleysu á Skólavörðustíg og Epal Hörpu.

Sinfóníuhljómsveit Íslands auglýsir lausa til umsóknar stöðu leiðara í fagottdeild. Umsóknarfrestur er til og með 17. júní 2019 og hæfnispróf fer fram 21. ágúst 2019 í Hörpu.

Nánari upplýsingar um starfið má á nálgast hér.

Í tilefni af stórafmælum Sinfóníuhljómsveitar Íslands (70 ára), Íslensku óperunnar (40 ára) og Listahátíðar í Reykjavík (50 ára) munu þessar menningarstofnanir blása til sameiginlegrar afmælisveislu og setja upp óperu Wagners; Valkyrjurnar eða Die Walküre vorið 2020. Uppfærslan er samstarfsverkefni þessara aðila og verður flutt 27. og 29. maí 2020 í Eldborg í Hörpu.

Aðalfundur Vinafélags Sinfóníuhljómsveitar Íslands verður haldinn á veitingastaðnum Bergmáli í Hörpu fimmtudaginn 23. maí 2019 kl. 16. Allir eru velkomnir og eru þeir sem vilja taka virkan þátt í starfi félagsins hvattir til að mæta.