2019 (Síða 6)

Aiōn er nýtt tón- og dansverk eftir Önnu Þorvaldsdóttur og Ernu Ómarsdóttur og er samstarfsverkefni Íslenska dansflokksins, Sinfóníuhljómsveitar Íslands og Gautaborgar. Verkið verður frumflutt í Gautaborg með Íslenska dansflokknum í vor og Sinfóníuhljómsveit Íslands sýnir svo verkið með í Hörpu í apríl 2020.

Flutningur Íslensku óperunnar og Sinfóníuhljómsveitar Íslands á óperunni Brothers eftir Daníel Bjarnason á Listahátíð í Reykjavík árið 2018 var valinn tónlistarviðburður ársins í sígildri og samtímatónlist á Íslensku tónlistarverðlaununum sem haldin var í Hörpu miðvikudaginn 13. mars.

Vinafélag Sinfóníuhljómsveitar Íslands býður á opna kynningu með Árna Heimi Ingólfssyni, listrænum ráðgjafa hljómsveitarinnar, í Hörpuhorni 14. mars kl. 18:20. Þar mun Árni Heimir kynna dagskrá næsta starfsárs hljómsveitarinnar ásamt því að gefa tónleikagestum innsýn í verkin sem hljóma á tónleikum kvöldsins.

Í vikunni standa yfir upptökur í Norðurljósum á íslenskum hljómsveitarverkum undir stjórn Daníels Bjarnasonar fyrir Sono Luminus útgáfuna. Síðar á þessu ári koma út tveir diskar með verkum m.a. eftir Önnu Þorvaldsdóttur, Pál Ragnar Pálsson, Þuríði Jónsdóttur, Hauk Tómasson og Maríu Huld Markan Sigfúsdóttur.

Nú leitar Sinfóníuhljómsveit Íslands og RÚV að tónlistarsögunum ykkar: Sögum af því hvernig sígild tónverk hafa haft áhrif á ykkur, hvernig þau minna ykkur á merkilega atburði eða minnisstæðar manneskjur. Sendu okkur þína sögu á ruv.is.

Sinfóníuhljómsveit Íslands og listamenn sem störfuðu með hljómsveitinni á árinu hlutu fjölda tilnefninga á Íslensku tónlistarverðlaununum í ár. Meðal annars er frumflutningur hljómsveitarinnar á Eddu II eftir Jón Leifs tilnefndur sem tónlistarviðburður ársins og Anna Þorvaldsdóttir, staðartónskáld hljómsveitarinnar, hlaut þrjár tilnefningar fyrir Verk og Plötu ársins. Tónlistarævintýrið Maxímús músíkús fer á fjöll er einnig tilnefnt sem Plata ársins.

Fimmtudaginn 21. febrúar hljómar Bow to String í fyrsta sinn á Íslandi í útsetningu fyrir selló og sinfóníuhljómsveit. Daníel Bjarnason samdi verkið fyrir Sæunni Þorsteinsdóttur sem er einn fremsti sellisti Íslands. Upphaflega stóð til að Pekka Kuusisto léki fiðlukonsert Daníels á tónleikunum en hann þurfti að aflýsa komu sinni vegna handarmeins.

Tónleikarnir verða teknir upp í mynd og streymt beint hér á vef hljómsveitarinnar ásamt því að vera útvarpað á Rás 1.

Sinfóníuhljómsveit Íslands óskar eftir að ráða fulltrúa á skrifstofu í fullt starf.

Umsóknarfrestur er til og með 4. mars 2019. 

Í vikunni tekur hljómsveitin á móti nemendum úr grunnskólum af höfuðborgarsvæðinu. Hljómsveitin leikur m.a. verk eftir Grieg, Beethoven, Dvořák og John Williams undir stjórn Tung-Chieh Chuang sem hlaut fyrstu verðlaun í hinni virtu Malko-hljómsveitarstjórakeppni árið 2015. Kynnir á tónleikunum er Halldóra Geirharðsdóttir.

Á síðustu árum hafa margir ungir hljóðfæraleikarar bæst í raðir Sinfóníuhljómsveitar Íslands og borið með sér ferska vinda úr ýmsum áttum. Þeirra á meðal eru Bandaríkjamaðurinn Frank Hammarin, sem gekk til liðs við horndeildina haustið 2016, og Bryndís Þórsdóttir, sem hóf störf sem fagottleikari vorið 2017. 

Í viðtalinu ræða þau helstu áskoranirnar við draumastarfið.