2021 (Síða 5)

Nýjasti gripurinn í hljóðfærakistu Sinfóníuhljómsveitar Íslands er alúfónn. Slagverksdeild hljómsveitarinnar prufaði hljóðfærið í fyrsta sinn í Eldborg nýlega. Það er gert úr fjölmörgum álkeilum og er hljómurinn í því einstaklega bjartur og fallegur. Hljóðfærið er gjöf frá Samál til hljómsveitarinnar.

Á uppskerutónleikum Ung-Yrkja föstudaginn 23. apríl næstkomandi frumflytur Sinfóníuhljómsveit Íslands þrjú glæný tónverk eftir þau Hjalta Nordal, Ingibjörgu Elsu Turchi og Katrínu Helgu Ólafsdóttur (K.Óla). Bjarni Frímann Bjarnason stjórnar hljómsveitinni en mentor verkefnisins er Anna Þorvaldsdóttir, staðartónskáld hljómsveitarinnar.

Sinfóníuhljómsveit Íslands skipti sér upp í minni hópa í dag og lék í Laugardalshöllinni fyrir þau sem biðu eftir bólusetningu og í Orkuhúsinu á Suðurlandsbraut fyrir þau sem mættur þar í skimun. Uppátækið vakti mikla gleði þeirra sem mættu í bólusetningu og skimun en ekki síður hjá heilbrigðisstarfsfólki sem þar vinnur sitt frábæra starf.

Sinfóníuhljómsveit Íslands var valin flytjandi ársins sem hópur á Íslensku tónlistarverðlaununum í flokki sígildrar- og samtímatónlistar í kvöld. Hátíðin fór fram í Hörpu og var send út í beinni sjónvarpsútsendingu á RÚV. Lára Sóley Jóhannsdóttir, framkvæmdastjóri hjómsveitarinnar, tók á móti verðlaununum í Hörpu og fór yfir þetta viðburðaríka og óvenjulega ár. 

Við kynnum til leiks metnaðarfulla og fjölbreytta vordagskrá Sinfóníuhljómsveitar Íslands. Tónlistin spannar vítt svið, allt frá Mahler til Egners og því ættu tónlistarunnendur á öllum aldri að geta fundið eitthvað við hæfi.

Sætaframboð er takmarkað og því gott að tryggja sér miða í tíma. 20% afsláttur er veittur af miðaverði ef keyptir eru miðar á tvenna tónleika eða fleiri í einu. Hlökkum til að sjá þig!

Þjóðleikhúsið og Sinfóníuhljómsveit Íslands unnu Lúðurinn, íslensku auglýsingaverðlaunin sem haldin voru í kvöld, í flokknum samfélagsmiðla fyrir myndbandið „Við hlökkum svo til".

Sinfóníuhljómsveit Íslands hlaut tvær tilnefningar til Íslensku tónlistarverðlaunanna 2021 í sígildri- og samtímatónlist, sem flytjandi ársins og fyrir tónlistarviðburð ársins. Verðlaunin verða veitt í Silfurbergi Hörpu laugardagskvöldið 17. apríl.

Í ljósi hertra samkomutakmarkana hefur Sinfóníuhljómsveit Íslands þurft að aflýsa öllum fyrirhuguðum tónleikum hljómsveitarinnar til 15. apríl.

Miðahafar eiga áfram inneign hjá hljómsveitinni sem þeir geta nýtt síðar á aðra tónleika sveitarinnar en einnig er hægt að fá miðana endurgreidda í miðasölu Hörpu.

Sinfóníuhljómsveit Íslands hefur hafið sölu á tónleikum í aprílmánuði. Boðið verður upp á sannkalla tónlistarveislu með glæsilegum fiðlukonsertum eftir Mendelssohn og Prokofíev, sinfóníum eftir Beethoven, Ives og Tsjajkovskíj, ásamt nýjum verkum eftir Önnu Þorvaldsdóttur, Caroline Shaw og þrjú ung og efnileg íslensk tónskáld. Tónleikum hljómsveitarinnar verður útvarpað í beinni útsendingu á Rás 1 líkt og vanalega.

Sinfóníuhljómsveit Íslands leitar að markaðsfulltrúa. Um er að ræða tímabundna ráðningu til eins árs í 100% starfshlutfalli. Umsóknarfrestur er til og með 5. apríl 2021.